Мақалада Кеңестік кезеңдегі Оңтүстік өңіріндегі тәркілеу науқанының жүргізілу барысы біршама зерттеп-зерделеніп, саяси науқанның салдарынан Сырдария округінің аудан-ауылдарындағы халыққа түскен салықтар, жер аударылғандар, бай-кулақ тізіміне енгендер және тұтқынға түскендердің нақты сандары келтірілген мұрағат құжаттары  таразыланады.

Нақты айтқанда, зерттеушілер Қаратас ауданындағы айтулы азаматтардың тәркілеуге ұшырау тауқы-метін тарқата көрсетіп беріп, Ержар болысына қарасты аудан жеріндегі бай-кулактар тізбесін келтіру арқылы  конфискациялаудың ауқымы кең болғанын да анық мұрағаттық мәліметтер негізінде деректерге сүйеніп дәйектеп береді. Одан тыс Әулие-ата үйезі Құмарық болысының ірі байлар мен Шу, Талас болысына қарасты байлардың  жасырын тізімін де жария етеді. Одан бөлек, 1928-1930 жылдардағы бай-кулактарды тәркілеу науқанындағы Оңтүстік өңірінен қуғын-сүргінге ұшыраған азаматтардың талайлы тағдырын мұрағат құжаттары негізінде зерделеп, саяси репрессия саясатын зерттеуде маңызды дерек көзі ретінде кәдеге асыруға талпыныс жасайды.

Сондай-ақ авторлар өткен ғасырдың осынау қайғылы беттерін тарқата талдап, сонымен қатар осы мәселеге қатысты мол статистикалық  деректерді кеңінен қолданады да, зерттеу нысаны етіп алынған тақырыпты жан-жақты ашып көрсетуге мейлінше   ұмтылады.

Сонымен қатар  ұлт зиялыларының осы мәселеге қатысты көзқарасы, кәмпескеге ұшыраған саяси қуғын-сүргін ұрпақтарының ескірмеген естеліктері де біршама  сарапталып, кеңірек сараланады.

Жалпы архив қорларында  тәркілеуге қатысты құнды материалдар жетерлік. Сол себепті авторлар  аталған тақырыптарға қатысты архивтік құпия құжаттарды ғылыми айналымға да  ұсынады.