Патшалық Ресейдің Қазақстандағы ғасырлар бойғы қалыптасқан өмір салтына күштеп араласуы қоғамның барлық салаларында, оның ішінде дінде қалыптасқан жүйені бұзады. Ресейдің отарлық саясаты, ең алдымен, байырғы халықтардың дін мен мәдениет саласындағы жетістіктерін жойып, өзіндік тәртіп орнатумен және тұрғылықты халықтардың империялық ақиқатқа бейімделуімен қатар жүрді. Оңтүстік аймақтарды жаулап алғаннан кейін патшалық Ресей діни саясатында араласпаудан біртіндеп қатаң бақылауға көшу жоспарын жүзеге асыра бастады. Ислам отаршылдыққа қарсы идеологиялық қаруға айналуы мүмкін деген қорқынышпен байланысты болды, сондықтан патшалық үкімет жоспары аймақты христиандандыруға үлкен үміт артты.