Ғасыр басында түркі жұртының оқыған, көзі ашық, көкірегі ояу ұлтжанды зиялылары халықтың рухани мұраларына ерекше ден қойып, бар ерік-жігерін оқу-ағарту саласының күшеюіне бағыттады. Бұл жолда татар зиялыларының атқарған рөлі мен орны ерекше. Татар зиялылары тек өз халқының ғана емес, бауырлас, діндес өзге де түркі – мұсылман халықтарымен тығыз байланыстар орнатып, олардың мұң-мұқтажына көпшіліктің назарын аударуға талпынды. Осы бір талпыныстар татар баспасөздерінен айқын көрінді.
Татар зиялылары еңсені басқан отарлық езгіден халық рухын көтерудің бір құралы баспасөз деп білді. Расында да жерінен, саяси бостандығынан айырылған талай түркі-мұсылман жұртының соңғы үміті, соңғы тірегі баспасөз болатын. Сонымен қатар оқу-ағарту саласында, баспаханалардағы жұмыстарда да татар зиялыларының қазақ интеллигенциясының қалыптасуындағы ағартушылық қызметіне жоғары баға беруге болады