Әлемдегі заманауи геосаяси жағдай халықаралық қауіпсіздік деңгейіне ықпал етіп отырған түрлі аймақтардағы әскери қақтығыстардың өсуімен айрықшаланады. Солтүстік Африка аймағы қақтығыс әлеуеті жоғары аумақ болып табылады және Египет – Судан мемлекеттері  арасындағы  тамырын тереңге жайған өзара қатынастарға қарамастан, қазіргі даму жағдайында екі мемлекеттің байланысы саяси қайшылықтарға ие және Ніл алқабы мен Африка жеріндегі қауіпсіздік пен тұрақтылыққа үлкен ықпалы бар мәселелер кешенінен құралған. Мақалада қарастырылатын ХІХ ғасырдағы Египеттің Суданға қатысты саясатының, Египет билеушілерінің басып алу жорықтарының, әкімшілік басқаруының ерекшеліктері және тарихын зерттеу арқылы, ХХІ ғасырдағы саяси-экономикалық және әскери дамудың үрдістеріне экстраполяциялық талдау жасауға мүмкіндік аламыз. Әлемдік тарихнамада Египет және Судан тарихына арналған ғылыми еңбектердің саны өте ауқымды болғанымен, Мұхаммед Әли кезеңінде басталған Судандағы Египеттің саясаты және елдің Египет дамуындағы геосаяси маңызы, Египеттік билеушілердің Суданда жүргізген модернизациялық саясаттары терең зерттеуді қажет ететін ғылыми бағыт болып табылады. Еуропалық, Түркия, араб тарихшылары, саяси қайраткерлері еңбектерінің желісінде, Египеттің Суданды жаулап алуының геостратегиялық мәні, негізгі себептері, Египет-түрік басқару жүйесінің Суданның әлеуметтік-экономикалық дамуындағы ықпалы, Египет билеушілері жүргізген модернизациялық үрдістер, ағылшындардың Африкаға қатысты отарлау саясаттарының ықпалы қарастырылады.