Бұл мақалада Қазақстан өңірлерінің 1990–2000 жылдар аралығындағы мәдени даму көрсеткіштері салыстырмалы түрде талданады. Кеңес Одағы ыдырағаннан кейінгі трансформация кезеңінде мәдени инфрақұрылымда орын алған құрылымдық өзгерістерге экономикалық, демографиялық және әлеуметтік факторлардың ықпалы қарастырылады. Статистикалық жинақтар, өңірлік есептер және мәдениет мекемелерінің ресми деректері негізінде кітапханалар, музейлер және театрлар жүйесінің динамикасы аймақтық айырмашылықтармен бірге зерделенді. Зерттеу нәтижелері көрсеткендей, аталған онжылдықта кітапханалар желісі республика бойынша едәуір қысқарып, әсіресе ауылдық өңірлерде мәдени қызметтердің қолжетімділігі төмендеді. Ал музейлер мен театрлар жүйесінде салыстырмалы түрде тұрақты немесе біршама өсу байқалды, бұл мәдениет саласына бағытталған мемлекеттік қолдаудың кезеңдік түрде жандануымен байланысты. Мақала өңірлердің мәдени дамуындағы ортақ және ерекше тенденцияларды айқындап, посткеңестік кезеңнің мәдени саясатының аймақтық ерекшеліктерін түсіндіруге мүмкіндік береді.