Бұл мақала еліміздің тарихындағы өзіндік мәні бар индустрияландыру кезеңінде қалыптасқан моноқалалардың даму мүмкіндіктеріне арналды. Мұны біз Жамбыл облысында орналасқан, Сарысу ауданының орталығы Жаңатас қаласы мысалында қарастырдық. Зерттеу барысында индустрияландыру кезеңінде қалыптасқан моноқалалардың тарихы, ол қалалардағы әлеуметтік-экономикалық мәселелер, постиндустриялық қоғамның талаптары мен моноқалалардың тұрақты даму мүмкіндіктері талқыланды. Жаңатас қаласының мысалында табиғи-географиялық әлеуетіне талдау жасалып, геокеңістіктік артықшылықтары мен кемшіліктері анықталды. Физикалық-географиялық жағдайы мен геоэкологиялық әлеуеті талданып, қаланың қазіргі инфрақұрылым жағдайы және әлеуметтік-экономикалық проблемалары белгілі болды. Қазақстанның көптеген шағын қалалары мен моноқалаларына ортақ күрделі әлеуметтік-экономикалық, қалалық жоспарлау, экологиялық бағыттағы проблемаларды жақсартуға бағытталған іс-шаралар кешені әзірленді. Қала дамуына тікелей әсер ететін факторлар тобы анықталып, Жаңатас қаласының тұрақты дамуының көп факторлы даму сценарийі ұсынылды. Әлеуметтік саланы модернизациялау, экономиканы әртараптандыру (диверсификациялау), қоршаған ортаны тиімді пайдалану және табиғи қауіп-қатерлерді басқару бағытындағы бұл тұжырымдар, қаланың тұрақты даму мүмкіндіктеріне негіз болады.