Бұл мақала ХХ ғасырдың орта тұсында Қазақстандағы геологиялық ғылымның дамуына елеулі үлес қосқан көрнекті ғалым, геолог және қоғам қайраткері – Өкітай (Сергей) Әлиханұлы Бөкейхановтың (1910–1957) өмірі мен ғылыми қызметіне арналған. Ол ұлт көсемі, мемлекет және қоғам қайраткері, Ресей Мемлекеттік Думасының депутаты, Алаш қозғалысының жетекшісі Әлихан Нұрмұхамедұлы Бөкейханның ұлы. Әкесінің саяси қызметі мен туыстарының репрессияға ұшырауына байланысты Өкітайдың өмір жолы мен еңбектері туралы деректер ұзақ уақыт бойы жабық болып келді. Мақала авторлары мұрағаттық деректер мен сирек кездесетін құжаттарды ғылыми айналымға енгізіп, оның өмір жолын, Жезқазған мен Қарсақпай өңірлеріндегі геологиялық барлау ісіне қосқан үлесін, Қаныш Имантайұлы Сәтбаев сынды көрнекті ғалымдармен ғылыми ынтымақтастығын талдайды. Сондай-ақ, зерттеу барысында БАҚ материалдары мен тарихи деректер сараланып, Өкітай Бөкейхановтың Қазақстандағы тау-кен өндірісін және геологиялық ғылымды дамытуға қосқан орасан зор еңбегі кешенді түрде қарастырылады.