Бұл мақалада 1950 жылдары Шығыс Түркістаннан Түркияға қоныс аударған қазақтардың көш процесі мен оның нәтижелері қарастырылады. Шығыс Түркістандағы саяси қысымдар мен этникалық қақтығыстар 1930 жылдардан бастап қазақтардың көшуіне себеп болды. Қытай билеушілерінің әділетсіз саясаты, әсіресе Оспан батыр сияқты жетекшілердің басшылығымен көтерілістер мен көш-қон қозғалыстарын тездетті.

Үдере көшкен қазақтар Тибет, Үндістан және Пәкістан арқылы ауыр сапарды бастан өткеріп, 1952 жылы Түркияға жетті. Мақала осы көштің себептері, кезеңдері және қазақ қоғамының Түркияға қоныстану үдерісін зерттейді. Сонымен қатар, Түркиядағы қазақ диаспорасының мәдени тұтастығын сақтау жолындағы әрекеттері мен Түркия мен Қазақстан арасындағы қатынастарды нығайтудағы рөлі де атап өтіледі.

Бұл көшу тек физикалық қозғалыс емес, сонымен қатар қазақтардың тіл, дін және мәдени құндылықтарын сақтау күресінің бір бөлігі болды. Түркияға қоныс аударған қазақтардың тәуелсіз Қазақстан мен Түркия арасындағы қатынастардың дамуына маңызды үлесі болды. Сөйтіп бұл диаспора Түркия мен Қазақстан арасындағы мәдени және саяси байланыстардың күшеюіне ықпал еткен көпір рөлін атқаруда.