Мақалада «Мәдени мұра» мемлекеттік бағдарламасының мақсаты мен міндеттері және оны жүзеге асыру мәселелері қарастырылған. Тәуелсіздік алғаннан кейін Қазақстанның алдында бұрынғы таптаурын коммунистік идеологиядан арылып, өзінің ұлттық құндылықтарын қайта түлету міндеті тұрды. «Мәдени мұра» мемлекеттік бағдарламасының өзектілігі де аталған міндеттерді шешуге қызмет етуінде. Авторлар бағдарламаның жүзеге асырылуының қорытындыларына: елдің мәдени мұрасын зерттеумен, зерделеумен және оны жинап сақтаумен, насихаттаумен, пайдаланумен байланысты кешенді жұмыстар шоғырын қамтығанына, тарихи қысқа мерзімде мемлекет тарапынан жасалған қамқорлық аясында Қазақстан халқының тарихи-мәдени мұрасын сақтауға және Қазақстан мәдениетінің шетелдерде танылуына әрі беделінің артуына мүмкіндік жасалғанына талдау жасаған. Бағдарлама нәтижелерінің ұлттың тарихи санасының жаңғыруындағы, қоғамдық сананың жаңаруы мен алға жылжуындағы, ұлттық бірегейлік пен ұлттық сана-сезімді қалыптастырудағы рөлі ашылған.